بحبك يا محمد التل ..بموت فيك ..ومش عارف أكرهك ..مش لأنك رئيس تحريري ..ولا لأنك نازل شطب في مقالاتي ..ولا لأنك تحذف إللي تحذفه و تخلّي إللي تخليه ..،، بحبك هيك ..مش بقولوا المحبة من الله ..وأنا بحبك في الله ..والله بحكي جد ..،، مش كل الكتاب بيزعلوا لما ينشطبلهم مقال..بس أنا غير كل الكتاب إللي مرّوا عليك ..أنا بحبك أكثر لما تشطب أكثر ..وعندي أسبابي للحب الكثير ..،،

لا سمح الله ما فيه بيني وبينك عداوة ولا ثار ولا حكي نسوان ..فليش بدك تشطبلي مقال هيك إلا إذا كنت ( خايف عليّ ) ..وخوفك عليّ يعني إنك بتحبني ..وهو يعني إنت بيطلعلك تحبني وأنا ما يطلعلي أحبك .. لا والله غير أحبّك وأحبك وغصب عن الراضي و الزعلان ..و المقال إللي ما يعجبك : برجلك وشوتو شلوط ...يروح مقال ييجي غيرو..يعني هو قلّة مقالات وقلة مواضيع ..؟ أصلاً الكاتب الشاطر هو إللي ما يغلب لما رئيس تحريرو يقول له : هات غيرو ..،، مشاكلنا بدل الألف ستين ألف ..و قصصنا بدل المليون عشرين مليون ..وقفت على أكمن مقال أخوك كامل يكون شاطح فيهن ومش عارف مصلحتو وين ..،، اشطب و تسلم يمينك ..وانا أشد على ايدك ..يظلمني كاني أظلمك أو أحكي معاني مبطنة ..،،

وبالأخير إنت حر ..تنزل هذا المقال أو تمنعو..بس خلي أي واحد يتصل ويقول : ابعث غيرو ..وأنا جاهز ...لأني بحبك وبحب الدستور و ما بحب أغيب ..المهم عندي إنك تفهمني صح..وتقتنع قناعة تامة إني بحبك ..ويشهد الله إني بحبك ..بحبك بحبك بحبك..لأنك بتحبني وأنا مقتنع بذلك..،،

abo_watan@yahoo.com